СВЕТОТ Е НОВ КОНЦЕНТРАЦИОНЕН ЛОГОР
Болните се виновни
здравите сомнителни
само затоа што од раѓање
ја носат во себеси смртта
Денес
размножувањето на микробите
се одвива под полициски надзор
Со бодликава жица
нè одвојуваат од нашите денови
и во најмрачните дамари
го пуштаат отровниот гас
на стравот
Ама ние
имаме други единици мерки за време
камбриум, ордовик
силур, девон, карбон, перм
тријас, јура, креда
Ние ги паметиме Еоните
и додека ни тетовираат броеви и жигови
нам ни расте нова кожа
