БРОЕЊЕ
во последно време сѐ нешто броиме
ги броиме чекорите што стојат меѓу нас
а не нѐ познаваат
ги броиме слоевите маски
што подмолно ни ги крадат лицата
и ги фрлаат на патот како предмети
за една употреба
си ги броиме зрнцата крв
за да видиме дали тоа некој од внатре нѐ јаде
и секундите ги броиме од навика
иако нема каде да одиме
– затворени сме во епрувети
со висока седиментација
секој ден се сопнуваме од исти бројки
живите од мртвите, мртвите од живите
а никако да ни текне дека
дека тоа животот нас нѐ брои неповратно
Во Списание за книжевност, уметност и култура „Раст“ (2021, бр. 24),
(Уред. Даниела Андоновска-Трајковска, Елизабета Јончиќ и Милица Димитријовска Радевска, Изд. Друштво на писатели „Битолски книжевен круг“ – Битола, РС Македонија)
In Journal of Literature, Art and Culture “Growth” (2021, No. 24)
(Editor in chief: Daniela Andonovska-Trajkovska, Ed. Elizabeta Jonchikj, Milica DImitrijovska Radevska, Publisher: Association of Writers “Bitola Literary Circle” – Bitola, North Macedonia)
