Друштвото на писатели Битолски книжевен круг изгуби плодотворен и доблестен човек.
Сочувство до неговото семејство и пријателите.
ПОЧИНА ПИСАТЕЛОТ ПАНДЕ МАНОЈЛОВ
Панде Манојлов, поет, прозаист, критичар и новинар, роден на 2 мај 1948 година во селото Породин, Битолско. Гимназиското средно образование го завршил во Гимназијата „Јосип Броз Тито“ во Битола. Студирал правни науки во Загреб (Хрватска) и Скопје каде што и дипломирал. Во македонската литература се појавува 1967 година, објавувајќи свои песни во тогашните весници „Студентски збор“, „Млад борец“, „Нова Македонија“, „Трудбеник“, како и во битолското списание за литература, култура и општествени прашања „Развиток“. Панде Манојлов е автор на книгитe „Црвен немир во црвено пламти“, „Соѕвездие на болот“, „Песни за Тито“, (поезија, 1983), „Огнена земја“, заедно со Љубомир Груевски ,„Блажевина“, „За Битола, вековите и љубовта“, „Срца, булки и снегулки“, „Македонски поетски молк“, „Обид да се влезе во нулата“, „Лет во сонот над Ајфеловата кула“, „Стап“, „Талија на битолската сцена“,„Песни за Никола и Дамјан“,„Љубов и чемер“,„Тевекелиски песни“, „Битола, љубов моја“, (поезија печатена напоредно на македонски и англиски јазик, ), „Месечина со превез“, „Сонувај добрина“, „Последната корида на душата“, „Ветровито време“, „До Учителот – низ сито и решето“, „Далечен сон“, „Сонот на детството“, „Глас од душата“, „Прегрни го светот“, „Мајчин јазик“ , „La langue maternelle“ издание на Ėditions Institut Culturel de Solenzara , Paris, France ,„Копнеж по времето“, „Песни за Палестина“, „Јужни песни“, и „Егзотичен ветер“.
Со свои песни и раскази е застапен во неколку избори и антологии во земјата и странство. Најмногу е препејуван на арапски јазик и негови песни на арапски јазик се објавувани во над петнаесет држави од арапскиот свет. Поединечни песни на Панде Манојлов се објавени во повеќе држави и на следните јазици: англиски, француски, руски, турски, германски, романски, италијански, арапски, српски, бугарски, хрватски, бошњачки, грчки, полски, унгарски, башкириски, татарски и други јазици.
Добитник е на повеќе значајни награди од областа на литературата: највисокото признание на градот Битола – наградата „4-ти Ноември“, наградата за најдобра поетска книга за деца и млади „Ванчо Николески“ на ДПМ, наградата за најдобра поетска книга за возрасни за 2019 година „Ацо Шопов“ на ДПМ, истоимената награда „Ванчо Николески“ за поетска книга за деца и млади – Битола, награда за песна на литературната манифестација на ДПМ „Празникот на липите“, награди за раскази на весниците „Студентски збор“ и „Нова Македонија“, втора награда за сатирична песна на Фестивалот „Ин Виница веритас“, наградата „Струшко изгрејсонце“ за најдобра книга за деца и млади во 2012 година, наградата „Последните селани“ (2015) на издавачот „Феникс“, Медал „Мажит Гафури“ за најубава песна од странски автор (Уфа, Башкортостан, Руска Федерација), Признание за заслуги на Државата Палестина (2017) и други.
