ВЕЛОСИПЕД
Прочитав некаде дека психолозите
можат многу нешта да научат за животот на луѓето
само ако постават прашања за нивниот велосипед.
Беше ли задоволен со бојата?
Беше ли таков каков што посакуваше да биде?
Татко ти ли те научи да го возиш
во опуштена атмосфера и насмеан во сончевите викенди?
Се сеќавам кога имав 12 години.
за прв пат видов детски велосипед
кога ѝ купија еден таков на Адра:
беше малку зарѓан, малку свиткан,
двојно постар од нас, но колку луда радост
беше тоа за сите деца на нашиот прашлив пат;
едно дете ќе го возеше, а сите останати ќе го следеа
охрабрувајќи го, помагајќи му,
преправајќи се дека не ги бројат тајно
секудите додека им дојде редот.
Никогаш вистински не научивме да го возиме,
зашто Андра се пресели кога нејзините родители
се разведоа.
Помеѓу тоа време и мојот сопствен велосипед
повеќе од една деценија помина.
Мојот велосипед кратко го користев,
бидејќи научив дека сум бремена.
Фаќаше рѓа на балконот откако го изгубив бебето.
Никогаш не купив друг.
Од тогаш помина една декада, помалку или повеќе.
Сега, кога ќе ми се даде можност,
изнајмувам или позајмувам од пријателите.
Не се случува пречесто; најчесто кога ќе се најдам себеси
во зелените паркови, со ексклузивни патеки за велосипеди.
Дури и се разминувам со други велосипедисти,
си правиме пат едни на други, насмевнувајќи се.
И тогаш се чувствувам како да позајмувам парче живот,
како да влегувам во дом
во кој не сум поканета.
Мањола Наси, Албанија
Manjola Nasi, Albania
Превод од англиски македонски: Даниела Андоновска-Трајковска
Translated from English into Macedonian:
Daniela Andonovska Trajkovska
Во Списание за книжевност, уметност и култура „Раст“ (2021, бр. 24),
(Уред. Даниела Андоновска-Трајковска, Милица Димитријовска Радевска и Елизабета Јончиќ, Изд. Друштво на писатели „Битолски книжевен круг“ – Битола, РС Македонија)
In Journal of Literature, Art and Culture “Growth” (2021, No. 24)
(Editor in chief: Daniela Andonovska-Trajkovska, Ed. Milica DImitrijovska Radevska, Elizabeta Jonchikj, Publisher: Association of Writers “Bitola Literary Circle” – Bitola, North Macedonia)