МАРАТОНСКА ПЕСНА
Ги претрчавме сите ледини.
И ливадите со лаванда и лалиња,
но и минските полиња. Попат некои
налетаа на мина. И летаа до ѕвездите.
А други пак направија букети
цвеќе за своите сакани.
Ги претрчавме и сите градови.
И бескрајните славни булевари
и мемливите ќор-сокаци.
Некои ги метеа сокаците со денови.
А други правеа паузи во рестораните
од хотелите со илјада и една ѕвезда.
Ги претрчавме и сите планини
сосе сртовите и терените за скијање.
Некои до полноќ туркаа карпи
на нагорнина а други дури и ноќе
скијаа слалом меѓу недоистурканите
камчиња и вештачкиот снег.
Ги претрчавме и парковите: и оние
со дрвореди и оние со скршени клупи.
Некои се распослаа на својот раскошен
појадок во трева. А други сè уште се
прашуваат како не можат да најдат дури
ни скршена клупа. Па затоа сè уште трчаат.
Во Списание за книжевност, уметност и култура „Раст“ (2021, бр. 24),
(Уред. Даниела Андоновска-Трајковска, Елизабета Јончиќ и Милица Димитријовска Радевска, Изд. Друштво на писатели „Битолски книжевен круг“ – Битола, РС Македонија)
In Journal of Literature, Art and Culture “Growth” (2021, No. 24)
(Editor in chief: Daniela Andonovska-Trajkovska, Ed. Elizabeta Jonchikj, Milica DImitrijovska Radevska, Publisher: Association of Writers “Bitola Literary Circle” – Bitola, North Macedonia)